قول لاء

يوم الأتنين الموافق 26 مارس 2007


يوم الاستفتاء على التعديلات الدستورية الجديدة

أقف أدام لجنتك الإنتخابية شيل يافطة سودا او شارة سودا او حتى قماشة سودا و اكتب عليها قول لأ

قول لأ للظلم و سلب الحقوق


قول لأ لتوريث البلد و الإستيلاء عليها

قول لأ لقمع الحريات

قول لأ للإعتقالات التعسفية

قول لأ...لو معرفتش تقولها في الإستفاتاء اقف و اقولها بصوتك


قولها بيافطة ..بشارة باي اي حاجة...المهم نبقى قولنا لأ

الدستور بتاع الجبلاوى و اوعى تفكر تفتح بقك بكلمة

من كام يوم كنت باسأل نفسى حنقاطع والا نشارك والا نراقب الاستفتاء

قالولى مافيش فايدة

و قالولى اكتبى شعر احسن

و قالولى الثورة جاية

ونزلت وسط البلد يوم الخميس علشان اقضى مصلحة

قضيتها و طلعت على ميدان التحرير لقيت الدنيا مقلوبة

أمن مركزى و مخبرين و ظباط و شباب الداخلية اللى بيسموهم فرق الكاراتيه

الحكومة نزلت تقول كلمتها علشان فى شوية ناس كانت عاوزة تعمل مظاهرة و تتعترض على التعديلات الدستورية

المظاهرة ابتدت فى التحرير الساعة خامسة

الساعة خامسة و ثلث كلمتنى محامية اعرفها قالتلى الأمن قبض على عشرة متظاهرين

كلهم شباب اعرفهم

اذكياء و طموحين ... و لكن الكارثة انهم لهم رأى

و الكارثة الأكبر انهم متهيئلهم انهم ممكن يعبروا عن رأيهم فى مظاهرة سلمية

و لكن الداخلية قالت كلمتها

فى اقل من ساعة كانت لمت اربعين واحد و عملت اللازم

المظاهرة تقهقرت و راحت اتزنقت عند حزب التجمع

المدونين زى علاء و منال و عرباوى كتبوا تقاريرهم

و المحاميين و بتوع حقوق الانسان راحوا يدوروا على الشباب فى الاقسام و النيابة

و الأصدقاء و الأقارب جابوا الأكل و البطاطين و الادوية

و كله بيجرى من القسم للنيابة لنيابة أمن الدولة

و كل كام ساعة يفرجوا عن كام واحد

لغاية ما بقى فى قائمة نهائية بالمتحفظ عليهم و كله مستنى قرار النيابة

امبارح طلع القرار بالافراج عن الشباب بس لازم الاول أمن الدولة تقول كلمتها

اخر كلام أمن الدولة حتسيبهم يروحوا النهاردة الظهر

أظن الرسالة واضحة

التعديلات الدستورية حتعدى من غير ما حد يفتح بقه

الدستور مش من الشعب و للشعب

الستور بتاع الجبلاوى

تعديلات دستورية بالجملة نشارك ... نقاطع ... نراقب ... والا مافيش فايدة

تعديلات دستورية نازلة السوق بالجملة

و البايع واحد والمشترى واحد

واحد قاعد فى قصر شبه قصر الجبلاوى بتاع اولاد حارتنا ...

والسوق ملييان ناس بتزعق و الدنيا زحمة و دوشة

و لكن المعلم نازل بالبضاعة و البلطجية واقفين يهللوا

و البيعة حتتم بالذوق او بالعافية

و الناس حتروح تزعق و تشتم و تشتكى شوية و تخلص الليلة على كدة

السوق الشهر الجاى و الكل بيحضرله

البلطجية بيلموا فى الاخوان المسلمين

الاحزاب بيزعقوا فى المجلس سيد قراره

القضاة بيناقشوا مواد لها ارقام ماحدش فاهم منها حاجة

و الحركات واقفة مش طالع لها صوت محتاسة تشارك والا تقاطع والا تنزل تراقب مع بتوع حقوق الانسان

ولو نزلوا و راقبوا و نشروا تقارير بترصد المخالفات

المصرى اليوم و الدستور و صوت الامة و شوية الجرايد المستقلة حتطلع علينا تقول البيعة فيها غش

و روز اليوسف و الاهرام و الاخبار و الجمهورية حتطلع تقول البيعة كانت زى الفل

و واحد حيطلع يرفع قضية على ابراهيم عيسى و واحد ثانى حيرفع قضية على وائل الابراشى

و ناشطين حيتهموا قيادات فى الحزب الوطنى و شوية ظباط فى الداخلية

و النائب العام حييرفض الدعاوى

و الناس حتقرا و تزعق و تشتم و تشتكى شوية و تصبح تجرى على اكل عيشها

و اكل العيش مش بالسهل