ننام و نصحى و نقول و نعيد

انا بادعي دعوة كل يوم

اول ما ادخل سريري وقبل ما يغلبني النوم

بادعي انه الأفكار الوحشة تفارقني 

و انه الغنوة و الصورة الحلوة هي بس اللي تصاحبنى 

و اقعد افكر نفسي بالناس الطيبين

صاحبتي الموهوبة و ابو دم خفيف و الشباب المبدعين

باشغل شريط الأغاني اللي بتفرحني

و اشوف بعقلى الافلام اللي بتزغزغ مخي و تصحصحني

باسمع صوت جدتي بتهنني

و احس بايد ابويا بتطبطب عليا و تطمني 

باشوف أولادي لما كانوا صغيرين

يا اخواتي  على جمالهم طعمين و مقطقطين

باشم ريحة هدومهم و هما مستحمين

و أسمعهم بيتصالحوا بعد ما كانوا متخاصمين

ريحة و صوت و صورة بتسعدني

قبل ما انعس و النوم يغلبني

#تصبحوا_على_خير 

عاوزة اعرف نفسي دايما باللي عايزه 

اللي نفسي فيه و اللي بأحبه  و اللي متمنياه

مش عايزة  أفكر في اللي كرهااه و لا الحاجات اللي مضايقاني 

عاوزة أبقى بنت نازلي و ام نازلي و ام عبده و عبده اخوه و أخوهم زيزو

عايزة أبقى نفسي و بس 

مش عاوزة أبقى اي حد ثاني

نفسي اصحى اشوف الدنيا حلوة و صافية و منورة 

اسمع زأزأة عصافير و صوت الهوا معدي على ورق الشجر 

 و ابن الجيران الصغنن بيضحك و يكركر

مش عايزة اسمع اخبار وحشة و لا اي حاجة مزعلاني

عاوزة اشرب شاي بلبن و معاه بقسماط مقرمش 

و اقعد في شمس الصبحية

و اسرح بخيالي 

عاوزة اقرأ رواية  تفاجئني

و اسمع مزيكا تبقى ممزجاني 

اخرج أتمشى حافية على رملة سخنة

و الشمس لامسة ظهري و مدفياني

عايزة أقابل ناس بتضحك

ناس بتغني و ناس بترقص

مش عايزة الناس الكشرة تبقى مكدراني

عاوزة اعرف نفسي بس بالحاجات اللي باحبها و الحاجات اللي مفرحاني 

#صباح_الخير