مصر تحزن لموت حفيد الرئيس - و اتذكر ام ممدوح

انا حزينة لموت حفيد سيادة الرئيس و متألمة لالم والدي الطفل و خاصة امه و ادعو لها بالصبر و ادعو الله أن يخفف عنها و عن كل افراد اسرة الطفل و احبابه ... و اتذكر ام اخرى فقدت طفل عمره مماثل لعمر محمد علاء مبارك ... اتذكر ام الطفل ممدوح الذى القى القبض عليه من محل اقامته بقرية شها التابعة لمدينة المنصورة بتهمة سرقة عبوة شاى من احدى المحلات و تم احتجازه بقسم الشرطة لمدة ستة ايام ثم نقل الى مستشفى الصدر بالمنصورة ثم القى به فى احد المواقف بالمنصورة و توفى بعدها بيومين متأثرا باصابة فى ظهره و جروح قطعية و حروق ... بعد التحقيق و المحاكمة اصدرت محكمة جنح المنصورة حكمها ببراءة الطبيب المتهم بالاهمال فى علاج ممدوح والذى توفى نتيجة التعذيب و امرت باحالة القضية للنيابة العامة لاتخاذ الاجراءات بشأن التحقيق مع مأمور القسم و رئيس المباحث و معاونيه باعتبارهم المتسببين فى وفاة الطفل ممدوح ابن الثنى عشر ربيعا نتيجة للتعذيب ... اتذكر ام ممدوح اليوم و ادعو لها بالصبر ... لقد فقدت ام ممدوح ابنها و لم تتوقف قنوات التلفزيون عن بث برامجها و لم ينشر خبر موته فى الصفحات الاولى من الصحف و لم تطمئن لأنه تلقى الرعاية الصحية التى يستحقها و لم تطمئن لبذل كل المجهودات لانقاذه و لم تشعر بتعاطف الملايين من المصريين ... اعذرونى لتذكر ممدوح و امه اليوم و لكننى تذكرته

دمشق - بيروت - القاهرة

قعدت بعد اذان المغرب اسمع الحكواتى فى قهوة النوفارة فى حارة القيميرية خلف المسجد اللأموى فى دمشق علشان انسى الأزمة الاقتصادية و انفلوانزا الطيور و الصراع السنى الشيعى و المد الفارسى و احكام محكمة النقض ببطلان عضوية ثلث مجلس الشعب و مشاكل اولادى و كبر امى و حاجات كثيرة قوى شاغلة بالى و منكدة عليا حبتين اليومين دول

و لحد كبير قدرت حواديت دمشق الساحرة و النهضة الحضارية للشام القديمة ترفع من معنوياتى

و بعد يومين شدينا الرحال على بيروت

و صخب بيروت و الاحساس بالحرية فيها نسانى مؤقتا كل همومى

و لكن بمجرد ما ركبت الطيارة علشان ارجع لأرض المحروسة
ابتديت اقارن بين دمشق و بيروت و القاهرة
و اللى فجر فيا المقارنة مضيف مصر للطيران اللى رفع كيس مشترواتى من مطار بيروت للمكان المخصص له فوق مقعدى
و بعدين سألنى لو كان الكيس فيه ويسكى؟! لأنه هو مابيشيلوش

سكتت لحظة و طمنته انه الكيس مافيهوش ويسكى
و انه فيه مكسرات و حلويات و عرق لبنانى

كشر فى وشى و قاللى : لو كنت اعرف ماكنتش شيلته

سكتت خالص و قعدت مكانى

كان نفسى اقوله يدور على شغل ثانى لأنه معرض لنفس الموقف فى كل رحلة
و لأنه ملزم كمضيف انه يساعد الركاب و كثير منهم بيشتروا "خمرة" من السوق الحرة
الا طبعا لو اشتغل على خط جدة او الرياض

و انا مستغرقة فى المقارنة بين اهل دمشق من سنة و علويين و يهود و مسيحين
و اهل بيروت اللى من كل ملة و دين و انتماء سياسى
و اهل مدينتى اللى باحبها
انتابتنى حالة غيرة مخيفة
و سيطر عليا سؤال واحد

احنا ليه بقينا نرفض اى حد مش شبهنا
و مين اللى مخوفنا من كل ملة و دين
و احنا ليه بقينا عدوانيين
و ماحدش فينا بيحترم التانى
و ماحدش فينا بيحترم شغله
و ماحدش بيبتسم فى وش الثانى و لا يقوله صباح الخير

القاهرة - مدينتى - قد سوريا كلها
و شبرا اكبر من لبنان على بعضها
و الادب الموسيقى و السينما المصرية هما اللى شكلوا الوعى الثقافى لكل اللى قابلتهم فى دمشق و بيروت
و مع ذلك انا مش قادرة اتغلب على شعورى بانهم بالرغم من مشاكلهم الكثيرة ماشيين لقدام
و احنا بالرغم من مقوماتنا العظيمة راجعين لورا

اليزبث بارت برونينج و اجمل توثيق لقصة حب

كلمتنى هالة عن توثيق قصص العشاق من المثقفين العرب فذكرتنى بمرحلة فى حياتى كنت مولعة اثنائها بقراءة الشعر الانجليزى و اروع توثيق لقصة حب اليزبث بارت و روبرت بروننج من خلال قصائدهم المتبادلة فعدت لابحث عن كتبى القديمة فلم اجد دواوينهم الرائعة - فقدت مع اشياء كثيرة فقدتها - فبحثت مع صديقى جوجل و وجدت كنز من الشعر الفيكتورى الرقيق و امضيت ليلة ساحرة بصحبة العاشقين و وددت لو كنت عاصرت هؤلاء الرومانسيون فى ذلك العصر الجميل و لكن مقولة لاليزبث بارت براوننج استوقفتنى ... قالتها و هى التى صارعت المرض طول حياتها و ماتت و هى فى الخامسة و الخمسين ... تقول الشاعرة

لا تصف من هو على قيد الحياة بالتعيس و لا تقييم عمل يوم الا فى نهايته

عدت لاقراء و انا سعيدة باللاب توب و جوجل و غير متحسرة على مكتبتى التى فقدتها و ممنونة لهالة التى ذكرتنى بمرحلة سابقة كانت مليئة بالسعادة

البوم الأصدقاء فى خيالى

فى الأيام الأخيرة وجدت نفسى اعود بذاكرتى لطفولتى و لطفولة اولادى و تذكرت كل الأصدقاء الخياليين الذين مروا بنا و سرحت بخيالى واعددت قائمة باصدقاء جدد لم التقى بهم ولكنى اعرفهم او اعرف الكثير عنهم و كان لهم تأثير كبير فى حياتى ... و لكل منهم صورة فى خيالى و لكل منهم مزايا و ربما نقاط ضعف جعلتنى اقدرهم و احبهم

فى البداية كانت القائمة طويلة و البحث عن الصور و الحقائق متعب فقررت أن انتقى اثنى عشر صديق و صديقة علشان القعدة تبقى ملمومة و حميمة و الحقيقة الأختيار من ضمن القائمة الطويلة كان اصعب من اعدادها و وجدتنى فى نقاش طويل مع نفسى لأننى لا اتخلى عن اصدقائى بسهولة ... لكن اليومين دول صعب و الاحباط و الاكتئاب لابسنى و لابس الدنيا كلها مما يستلزم رفع خطوط الدفاع و استحداث طرق الهروب ... و اخيرا قررت أن اكتفى بدستة اصدقاء خياليين يخفوا العبء عن اصدقائى الحقيقييين الذين يعانون من نفس اعراض الاكتئاب و الاحباط التى اصابتنى مؤخرا و ماحدش فيهم قادر يشيل نفسه اصلا

اختيارى لم يكن عشوائى و كان له معايير و حيثيات و بالرغم من ذلك النتيجة اذهلتنى

اصدقائى من النساء اقلية

و الأغلبية من الموتى

و القلة المتبقية على قيد الحياة من غير المصريين

من النساء اخترت الست ام كلثوم لأنها سيدة قوية و موهوبة و ذكية و اغانيها اسعدتنى و هونت عليا ايام سودا كثير و بكتنى و اطربتنى و اضافت لاحساسى باهم قيمة فى الحياة - الحب

و السيدة الثانية هى سعاد حسنى - سندريلا المعذبة التى لم تنل النهاية السعيدة و لا امير الأحلام و مع ذلك اسعدتنى و اسعدت كل بنات جيلى و بنات جيل بنتى بافلامها و اغانيها و رقصها و خفة دمها

اما قائمة الرجال المصريين فتضمنت تشكيلة جذابة و غير متجانسة و لا يجمع بينهم الا الموت

من مراهقتى بقى معى رشدى اباظة و عبدالحليم حافظ و اسباب تعلقى بهم ذات طابع عاطفى و نوستلجى - حنين لشبابى

اما من اصدقائى المصريين الذين ساهموا بشكل كبير فى نضجى و تشكيل وعيى و احساسى بالجمال - وقع اختيارى على نجيب محفوظ و سيد درويش و يوسف شاهين

و من بلاد الشام اخترت ادوارد سعيد الفلسطينى المولد و الدولى الهوية و زياد رحبانى المتمرد العبقرى و رفيق السنوات الاخيرة

اما الأصدقاء الفرنجة الذين لم اشعر بالغربة معهم ابدا فكان على رأسهم الأديب الكولومبى الذى اجبرنى على تعلم اللغة الأسبانية - جبرييل جارسيا ماركيز

وبقى صديقين احترت فى اختيارهم الى ان توصلت للاثنين اللى كان لهم تأثير كبير فى نموى الفكرى و الأكاديمى : نعوم تشومسكى عالم اللغويات و كولين ويلسن الكاتب و المفكر الانجليزى

من حسن حظى انى التقيت بنجيب محفوظ و ادوارد سعيد و يوسف شاهين
و مين عارف يمكن يجى يوم و اقابل بقية اصدقائى الخياليين - فى الحياة دى او فى حياة اخرى
ولو ماتقابلناش يبقى كفاية عليا اللى هما اضافوه ليا و الأيام اللى اسعدونى بيها و ساندونى فى تقبلها

صفر + صفر = صفر ... معادلة جامعة الدول العربية

حبيت اعرف موقف جامعة الدول العربية من اللى بيحصل فى غزة و اشوف وصلوا لايه فى موضوع مؤتمر القمة اللى مش عارفين ينظموه فقلت بلاش آخذ معلوماتى من الجزيرة لأنها منحازة لقطر و بلاش العربية لأنها بتاعة آل سعود اللى انا ماباطملهمش و اكيد ماقدرش اعتمد على الاعلام المصرى لأنه بيكذب علينا من يوم ما وعيت على الدنيا و انا مابقتش صغيرة و ساذجة علشان اصدق تلفزيون و جرائد انس الفقى ... قلت لازم يا بنت تواكبى العصر و تعملى بحث الكترونى و تجيبى معلوماتك من المصدر و اتجهت بكل امكانياتى و تقنياتى الالكترونية اللى اتعلمتها على كبر و الحمدللله و رحت موقع جامعة الدول العربية الرسمى .... و بركة اللى عملت كدة لأنى اتمنطت و احب اطمنكم و اشاركم يا جماعة المدونين و المتابعين فى الفضاء الالكترونى

الأخبار و البيانات النهارده- 15 يناير 2009

موسى يبحث العدوان على غزة مع مبعوث اليابان للشرق الأوسط (12/1/2009)
• القرار 1860 ( 2009) الذي اتخذه مجلس الأمن في جلسته 6063 المعقودة في 8 كانون الثاني/ يناير 2009
• الجامعة العربية تدين حادث اغتيال نائب رئيس المصالحة في الحكومة الانتقالية الصومالية (29/12/2008)
• إعلان قطر الصحة والعافية من خلال النظم الصحية المرتكزة على الرعاية الصحية الأولية - 6 ذو القعدة 1429 الموافق 4 تشرين الثاني / نوفمبر 2008
• كلمة صاحب السمو الملكي الأمير سعود الفيصل وزير خارجية المملكة العربية السعودية الاجتماع الاستثنائي لمجلس جامعة الدول العربية - القاهرة - 31 ديسمبر 2008م
• بيان بمناسبة الذكرى (91) لوعد بلفور (29/10/2008)
• بيان صادر عن الأمانة العامة لجامعة الدول العربية (22/9/2008)
• وثائق منتدى التعاون العربي - الصيني

اهم الأحداث

مؤتمر القمة العربية الدورة العادية العشرين-دمشق مارس/آذار 2008

القمة العربية الاقتصادية والتنموية والاجتماعية

البرلمان العربي الانتقالي

نشاط الجامعة اليوم
• ندوة إطلاق "تقرير المرأة العربية والإعلام" الأمانة العامة- 18-19/06/2006 تحت رعاية السيد عمرو موسى الأمين العام لجامعة الدول العربية، تنظم وحدة المرأة بالأمانة العامة بالتعاون مع صندوق الأمم المتحدة الإنمائي للمرأة (اليونيفم)، ومركز المرأة العربية للتدريب والبحوث (كوتر) ندوة إطلاق "تقرير المرأة العربية والإعلام" (دراسة تحليلية للبحوث الصادرة بين 1995-2005) خلال يومي 18-

19/06/2006 بمقر الأمانة العامة

انا كدة اتمنطت و اتأكدت انه مقولة عبدالرحمن باشا عزام عن جامعة الدول العربية اللى ساهم فى تأسيسها صحيحة

صفر +صفر = صفر

ذبابة على حائط مكتب سيادة الرئيس

اتخيلت نفسى دبانة

كنت واقفة على حائط مكتب سيادة الرئيس من كام يوم

و حضرت جلسته التاريخية مع تسيبى ليفنى ليلة الهجوم الاسرائيلى على غزة

فكنت شاهدة على ان الرئيس ماتفقش معاها على قصف غزة

و انه برىء من كل الاتهامات التى يتهامس بها المغرضين

و هذه شهادتى للتاريخ

نص المقابلة

صباح الخير يا تسيبى ... نورتى مصر يا بنتى

مصر منورة بيك يا عمى - ازيك؟ و ازاى سوزان هانم؟ و جمال ؟

الحمدلله - كله كويس - سوزان تعبانة جدا فى مشروعها بتاع السلام و جمال مشغول حبتين - انتى عارفة بقى - مانتم من سن واحد و همومكم زى بعض

ربنا يحميه و يخليك ليه

ربنا يخليكى و يحميكى يا تسيبى - جمال ده اللى حيشيل الهم من بعدى و انا قلقان عليه

ماتقلقش عليه يا عمى - احنا حنقف معاه

ربنا يعينه و يعينكم - قوليلى بقى اخباركم ايه؟

احنا زى الفل

و عاملين ايه مع الأولاد بتوع حماس؟

كله تمام - ماتقلقش نفسك

انا اصلى اتضايقت قوى من كام يوم - اتصورى السوريين عملوا مظاهرات ضدى و شتمونى؟

يا خبر ابيض؟ وبعدين حضرتك عملت ايه؟

لا ... انا ماسكتش ... خليت ابو الغيط يشد السفير بتاعهم و سمعه كلمتين جامدين

معاك حق والله - دى قلة ادب

والاخوان و الصحفيين بتوع المعارضة عامليين دوشة على موضوع معبر رفح

معلهش حضرتك عارف انهم بيعملوا دوشة عمال على بطال

و العيال بتوع الجامعة عاملين غاغة على الفيسبوك و المدونات

طيش شباب يا عمى ... والنبى ماتضايقش نفسك

البركة فى حبيب و رجالته ... المهم قوليلى يا حلوة انتى ايه اللى جايبك هنا؟

انا جاية اطمنك علينا و اقولك كل سنة و انت طيب و انشاءالله تسمع اخبار حلوة قريب

انشاءالله

مش عاوز حاجة قبل ما امشى يا عمى؟

عاوز سلامتك يا بنتى انتى مش عاوزة حاجة

لأ اشوف وشك على خير و هابى نيو يير

هابى هانوكا يا امورة

ومشيت الأمورة تسيبى و الرئيس بيفكر

هى ايه اللى جابها؟ مش مهم! انا مش ناقص مشاكل

كلها كام يوم و الدنيا تهدأ و الناس تنسى حصار غزة و تتلهى فى أكل العيش و الدورى العام و مسلسلات التلفزيون و صراعات نقابة المحاميين و نادى القضاة و مقتل فنانة و .... انا داخل انام

حدوتة جزمة بوش و مجانين مصر المحروسة

فى يوم من الايام يا سادة يا كرام كان فى رئيس وزراء مصرى اسمه مصطفى باشا النحاس و كان النحاس فى الاسكندرية و هجم عليه مواطن مصرى و لسعه قلم على وشه فاتلم الحرس و الخلق و اخذوا لمواطن ابو ايد طويلة و عملوله محضر فى القسم - ايوه النحاس بجلالة قدره عمل محضر للمواطن

و تعدى السنين و الايام وفى مصر المحروسة برضه يدخل شاب على متاريس الحراسة بتاعة قصر جمهورى بيعدى عليه رئيس جمهورية مصر احيانا

فاتلم الحرس و السلاح و قاموا ضربين الشاب بالرصاص و طلع يا عينى مجنون و مهووس

زى المواطن بتاع بور سعيد اللى رمى سائل على موكب الرئيس ذاته و اترمى بعدها فى مستشفى امراض عقلية

وبعد سنين مش طويلة قام مواطن عراقى و رمى جزمته على رئيس امريكى

فانتفض الشعب المصرى و فرح و اعتبر ده عمل بطولى

ونشرة الاخبار الرسمية فضلت تعيد الخبر علشان تشارك الشعب فرحته و اعتبرت الصحفى العراقى بطل و مناضل

على عكس الشاب المصرى المسكين اللى اتقتل على يد الحرس الجمهورى

و البورسعيدى اللى دخلوه مستشفى المجانين

و توتة توتة فرغت الحدوتة