Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Friday, December 20, 2013

صباح الخير يا اهل الخير و المذنبون يمتنعون

بقالى سنتين باعانى من اضطرابات فى النوم.
ايام ماعرفش أنام لحد الفجر
و ايام أنام ثلاث ساعات و اصحى مفنجلة
و اغلب الأيام أنام و مخى شغال كوابيس و احاديث و أسئلة و سيناريوهات كاملة فيها كلام كثير و صور واضحة جدا بابقى شايفاها كأنها جنبى على السرير و بابقى متفاعلة جدا معاها

امبارح كانت خناقة

أصدقاء و معارف ملمومين عليا عند قسم القاهرة الجديدة 
مش الأصدقاء اللى كانوا فعلا معايا يوم احداث مجلس الشورى لما نازلى و صديقاتها كان مقبوض عليهم ... لا الأصدقاء اللى من يومها متفرغين لانتقاد نزول نازلى فى وقفة "لا للمحاكمات العسكرية للمدنيين"

فى الكابوس كانوا بيرددوا الكلام اللى كتبوه على فيسبوك و اللى تطوعوا و طلبونى علشان يقولوه ليا فى التليفون .. فجأة انفجرت فيهم و الظاهر انه عقلى الباطن شغال بقاله أسابيع لأننى صحيت مفزوعة من اللى قلته و زعلانة من نفسي انى شايلة كل ده ... انفجرت فى المونولوج التالى:

انتى يا هانم بتكلمينى عن القانون... انا مش ناسية منظرك و انتى بتضربى الولد الصغير اللى كان شغال عندك فى البيت
و حضرتك بتقول حق سواق المنصورة؟ انت ناسي لما أتحكم عليك فى قضية قتل خطأ و قعدت الست الوالدة تدفع لامين الشرطة اللى كان بيبتزكم علشان انت هربان من حكم بالسجن. فاكر حق اللى قتلته و لا نسيته؟
و انتى يا حلوة ياللى بتعيبى على تهور الشباب و استهتارهم نسيتى قضية المخدرات بتاعة ابنك لما أتمسك بحشيش على الطريق الصحراوي؟ 
و انت يا افندى ياللى بتقول لى بهدلتينا فى الأقسام مش فاكر وقفتى ليك على باب القسم و انت متهم فى جريمة مخلة بالشرف؟
و حضرتك يا بيه ياللى بتترحم على ايام مبارك و بتتكلم عن النزاهة .. ناسي انه العز اللى انت فيه ده من فلوس الثورة الجزائرية اللى نهبتوها فى الستينيات؟
و انتى يا حلوة جاية من باريس تنظرى علينا؟
ده انتم و لا شخصيات فيلم المذنبون ... كل واحد مخبى على مصيبة و عامل فيها برئ
امشوا من وشى الساعة دى 

بس كده ... صحيت و انا باقول امشوا من وشى الساعة دى

صباح الخير يا اهل الخير و المذنبون يمتنعون