Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Tuesday, November 30, 2010

مشهد من انتخابات مجلس الشعب فى الاسكندرية

المشهد الأول
داخل لجنة فى مدرسة ابيس اتنين
الساعة التاسعة صباحا
استاذ ايهاب رئيس اللجنة موظف من مرفق المياه جالس على دكة خلف مكتب صغير و بجواره اثنين من المساعدين. ادخل بصحبة ظابط امن اثناء توقيع ناخبة على كشوف الناخبين
الظابط يتحدث بصوت جاهورى: الدكتورة بتاعة حقوق الانسان
استاذ ايهاب متسائلا: حتنتخبى حضرتك؟
انا: لأ حاراقب بعد اذن سيادتك
ينظر استاذ ايهاب الى الظابط بريبة
الظابط: الدكتورة جاية تراقب .. حنقعدها شوية (يوجهنى الى دكة المندوبين) اتفضلى اقعدى
اجلس بجوار اثنين مندوبين و اخرج قلمى و اوراقى من شنطتى
انظر الى المندوبين و اسألهم:حضرتكم مندوبين عن اى مرشح؟
المندوبين ينظرون الى الظابط و تبدو عليهم ربكة
الظابط يهز رأسه بالموافقة
المندوبين معا: السيد الوزيرعبد السلام المحجوب
اتوجه بالحديث لرئيس اللجنة استاذ ايهاب
فى مندوبين حاضرين عن مرشح تانى؟
استاذ ايهاب: انا ماشفتش مندوبين تانين
الظابط: مافيش مندوبين غير بتوع سيادة الوزير
الظابط يوجه كلامه للعسكرى الواقف على باب اللجنة
دخل الناخبات .. واحدة واحدة و بالدور
الشرطى: ادخلى يا ست
تدخل ناخبة تحمل بطاقة ارشادية خضراء عليها شعار الحزب الوطنى و تعطيها للاستاذ ايهاب
استاذ ايهاب ينظر للبطاقة ثم ينظر لى و يعلو صوته بسؤال الناخبة
معاكى بطاقة انتخابية؟
السيدة: ايوة دى
استاذ ايهاب: لأ .. البطاقة اللى لونها بمبى
السيدة بتعجب: لأ
استاذ ايهاب: طيب معاكى رقم قومى؟
السيدة: لأ
استاذ ايهاب: معاكى اى حاجة عليها صورتك؟
السيدة: لأ
استاذ ايهاب بحزم شديد: يبقى ما ينفعش تنتخبى .. اتفضلى اخرجى
السيدة: بس انا جيت اهه
استاذ ايهاب: ماينفعش يا ستى
و هنا يتدخل الظابط و يدفع بالناخبة الى خارج اللجنة
اترك مكانى على الدكة و اتوجه للأستاذ ايهاب بالشكر و اخرج لألحق بالسيدة و الظابط و الشرطى بالخارج وسط مجموعة كبيرة من السيدات
وسط ضجيج السيدات اسمع صوت الناخبة المطرودة من جنة اللجنة - صوت غاضب جدا
ماخلونيش انتخب علشان الخواجاية بنت القحبة اللى قاعدة جوة
اترك اللجنة و انا حزينة لأننى حرمتها من مئة جنية و جبت الكلام لأمى
بس اكيد تكون عادت بعد رحيلى و انتخبت و قبضت

2 Comments:

  • At 1:55 PM, Blogger Crono said…

    ماخلونيش انتخب علشان الخواجاية بنت القحبة اللى قاعدة جوة
    هههههههه
    و لله الشعب المصري ده غلبان

    انا روحت عشان انتخب كنت سامع ان الانتخاب بالبطاقة و ان الي مواليد 89 اتسجلو اوتوماتيك و المفروض تروح القسم تشوف لجنتك فين و تروح تنتخب علاطول من غير بطاقة انتخابية ولا حاجة
    روحت الاسم لقيت زحمة حوالين ظابط و معاه لابتوب و قال هات البطايق و احنا هنقولوكو مكان اللجنة
    اديت البطاقة و قعدت مستني علي ما يشوفني المهم بعد كده جه ظابط كبير قال الي معهوش بطاقة انتخابية مينفعش ينتخب اصلا عكس الكلام الي سمعته قولت مش مهم و نبقي ننتخب المرة الجاية
    ده غير ان اصلا كان معظم الناس كان معاهم بطايق انتخابية بس راحو اللجان بتاعتهم لاقوها اتغيرت
    ده غير ان في ناس بطايقهم ضايعة بس اسمهم متسجل و بردو مخليهومش ينتخبو

    المهم بعد ما اليوم ضاع اكتشفت ان عشان صوت الناس يتسمع لازم نسهلهم الامور و نستخدم نظام الكتروني في الانتخابات يكون سهل علي الناس عشان نشجع الناس انها تنتخب فبالتالي اي حد ممكن ينتخب من اي لجنة مجرد انه يعدي البطاقة الشخصية علي جهاز و يختار الرمز بتاع الناخب و خلاص

    اول مرة اقرالك بس مش حتكون الاخيرة اسلوبك اكتر من ممتاز

     
  • At 12:52 PM, Blogger Purple Rose of Cairo said…

    الناس اللى انتخبت الدورة دى ماراحوش الللجان اصلا و الشوية اللى راحوا علشان مئة جنيه والا كيس تموين مش مسجلين فى الكشوف الانتخابية ... ماتزعلش انك ما انتخبتش لأنك مش من دول

     

Post a Comment

Links to this post:

Create a Link

<< Home