ذبابة على حائط مكتب سيادة الرئيس
صباح الخير يا تسيبى ... نورتى مصر يا بنتى
مصر منورة بيك يا عمى - ازيك؟ و ازاى سوزان هانم؟ و جمال ؟
الحمدلله - كله كويس - سوزان تعبانة جدا فى مشروعها بتاع السلام و جمال مشغول حبتين - انتى عارفة بقى - مانتم من سن واحد و همومكم زى بعض
ربنا يحميه و يخليك ليه
ربنا يخليكى و يحميكى يا تسيبى - جمال ده اللى حيشيل الهم من بعدى و انا قلقان عليه
ماتقلقش عليه يا عمى - احنا حنقف معاه
ربنا يعينه و يعينكم - قوليلى بقى اخباركم ايه؟
احنا زى الفل
و عاملين ايه مع الأولاد بتوع حماس؟
كله تمام - ماتقلقش نفسك
انا اصلى اتضايقت قوى من كام يوم - اتصورى السوريين عملوا مظاهرات ضدى و شتمونى؟
يا خبر ابيض؟ وبعدين حضرتك عملت ايه؟
لا ... انا ماسكتش ... خليت ابو الغيط يشد السفير بتاعهم و سمعه كلمتين جامدين
معاك حق والله - دى قلة ادب
والاخوان و الصحفيين بتوع المعارضة عامليين دوشة على موضوع معبر رفح
معلهش حضرتك عارف انهم بيعملوا دوشة عمال على بطال
و العيال بتوع الجامعة عاملين غاغة على الفيسبوك و المدونات
طيش شباب يا عمى ... والنبى ماتضايقش نفسك
البركة فى حبيب و رجالته ... المهم قوليلى يا حلوة انتى ايه اللى جايبك هنا؟
انا جاية اطمنك علينا و اقولك كل سنة و انت طيب و انشاءالله تسمع اخبار حلوة قريب
انشاءالله
مش عاوز حاجة قبل ما امشى يا عمى؟
عاوز سلامتك يا بنتى انتى مش عاوزة حاجة
لأ اشوف وشك على خير و هابى نيو يير
posted by Purple Rose of Cairo @ 12:51 AM
6 Comments:
At 2:15 AM,
Anonymous said…
ناولوني البيروسول فوراااااااااااااااااااااااان .. هيا كمان ناقصه الدبان
At 5:01 AM,
Anonymous said…
اللة ينيل اهلك ياست ليفنى دا انا كدة زعلااااااااااان جدا
بس مش مشكلة ابو الغيط هوة اللى هيظبطها وووووووبعدين ياسيدي نقول اية الوزة جت ضربت غزة!!!!!!!!
وسلم لي علي السلام
ضرورى السلام امانة
السلام ياجدعان
احسن من غير السلام العملية مش تمام
والسلام
At 10:50 AM,
ahmad said…
و لو ان أنا ضد التوجه الشعبي العام لتحميل مصر مسؤولية اللي حصل
مش لاني باحب الحكومة المصرية ، و لا حاجة
بس لان ده بيغسل حماس و عناصر فاسدة اكثر في الداخل الفلسطيني من خطايا رهيبة أدت- ولا زالت تؤدي- إلي موت العشرات
و بيلمع صورتهم كضحايا فقط ، و ربما يعطيهم قوة تشابه ما حدث مع حزب الله بعد الحرب
لا أحب ما حدث ، و لا أتمنى أن يجرح اي فلسطيني آخر ، لكني لا أريد أن نخرج بهذه الازمة حاملين حماس على الأعناق ، و جاعلينهم ضحايا لكل من حولهم ، و الحقيقة الضحايا هم أهالي القطاع باختلاف توجهاتهم.
إنما التدوينة دمها خفيف
:)
At 12:52 PM,
Purple Rose of Cairo said…
انا كنت متأكدة انى حاتعرض لهجمة كيماوية بالبيروسول من جهة مجهولة
زعلان ليه من الست ليفنى دى بنت جدعة و مكافحة و بتشوف شغلها
يا اخ احمد انا والله باعفى مصر من المسؤولية لأن حكومة مصر اضعف كثير من كدة
و كمان موافقة تماما انه حماس بتبيع دم الفلطنين علشان تحقق مكاسب فى الاعلام ... لكن مانقدرش نعفى حكومة اسرائيل من المسؤلية
At 11:53 PM,
Anonymous said…
AFTER MUBARAK SPEECH YESTREDAY ICAN SAY WE MUST RETHINKING AGAIN ABOUT ALL WHAT IS GOING IN GAZA STRIP BECOUSE WE CAN SMLE IRANIAN WAY IS UP THERE . AND WE MUST STOP IGNORING OUR SELFES MORE THAN THIS BECOUSE WE ALLREADY PAID HIGH PRICE IN PALSTINIAN ISSUE....PLS WE MUST RETHINKING AGAIN ABOUT ALL OUR INSIDE PROPLEMES.
At 2:17 AM,
ابو هيثم said…
التدوينة اخر حلاوة .
وتغريك بالمتابعة الى اخر حرف فيها .
وصدقوني ان مثل هذه الكتابات انقرضت تقريبا .
الموضوع جميل وطريقة معالجته اجمل .
فقط علقت على الموضوع لكي اقول ان الذبابة مخلوق جميل وقرانا عليها اعجازا كبيرا في القران .
اما الذبابة التي في الموضوع فاعتقد انها من احقر الذباب .
دمتم متميزون ومتالقون
Post a Comment
<< Home