Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Wednesday, November 14, 2007

من "هو فى ايه" ل "القاهرة اليوم" يا قلبى احزن

اولا لازم اعتذر لمدونتى اللى هجرتها اكثر من شهرين ... الأول شهر رمضان و بعدين العيد و بعدين شغل و ملل و شغل و ملل ... و اهمال و مش لاقية حاجة اقولها .. لكن امبارح بالليل لقيت نفسى عاوزة اصرخ و اصوت و الطم و ارمى نفسى من الشباك ... لقيت نفسى عاوزة اقول كلام كثير و طبعا مافيش الا المدونة فى الايام الغبرة دى
الحدوتة ببساطة انى مريضة و عندى دور برد من العيار الثقيل اللى بييجى بعد هباب السحابة السودا و مع دخول الشتا و لما لقيت نفسى قاعدة يومين على الكنبة قلت اتفرج على التلفزيون
فتحت التلفزيون المصرى (او تلفزيون أنس الفقى) لقيت برنامج اسمه "هو فيه ايه" قلت و الله اسمع الناس بتقول ايه ... لازم برضه الواحدة منا تبقى متابعة هو في ايه و لقيت المذيع بيسأل الناس فى ميدان طلعت حرب عن رأيهم فى عمل المرأة بعد الساعة ثمانية مساءا فتصورت انها فقرة تاريخية و مالهاش دعوة بالحاضر و لكن طلعت مش متابعة و مش دريانة بالدنيا فبعد استطلاع رأى الشارع رجعت الكاميرا لستوديو عصرى جدا- و ان كان ينقصه كثير من الذوق و لكن دى مش قضيتنا- و ابتدى المذيع و زميلته المذيعة يسألوا الضيفتين (الاثنين من النساء الناشطات فى المجتمع المدنى) فى رأيهم فى قرار السيدة الوزيرة عائشة عبد الهادى بان الستات مايشتغلوش بعد الساعة ثمانية مساءا الا بتصريح خاص ... والله ده اللى تلفزيون انس الفقى نقلهلنا! و الاعجب من كدة انه الست المذيعة كان موقفها من القرار محايد و بتسأل و بتناقش و مش مستعجبة ولا مستهجنة الفكرة و غالبا مش واخذة بالها انه الساعة عدت ثامنية و هى لسة برة البيت! و انه الست الوزيرة غالبا مش حتحضر جلسات مجلس الوزراء الا باذن! و انه الضيفتين اللى عندها برضه محتاجين تصريح علشان يقعدوا معاها!!! انا فعلا عاوزة افهم "هو فى ايه" غالبا دى تخاريف او على رأى ضيفة البرنامج الوزيرة قررت تساعد الاخوان المسلمين و تطبق لهم قانون يتفوق فى رجعيته على برنامجهم
بعد فنجان ينسون و حبيتين صداع قلت بلاش تلفزيون أنس واتفرج على "القاهرة اليوم" بتاع عمرو أديب يمكن الاقى حاجة تريحنى شوية و تخفف الغم و الهم .. لقيت عمرو أديب و معاه الفنانة هالة فاخر بيبتدوا فقرة "مثيرة" و معاهم ضيفتين (برضه اثنين ستات ناشطات مجتمع مدنى) و واحد راجل سماه عمرو اديب المدافع الأول عن حقوق الرجال (طبعا لأنه المجتمع العربى فى أزمة حقوق رجال) و استهل الأستاذ عمرو بقوله :بعد أن قدمت القاهرة اليوم فقرات عن حقوق الانسان النهاردة حننزل لتحت شوية و نتكلم عن حقوق المرأة و طبعا علشان الأستاذ عمرو كل همه هو تسخين الحلقة اختزل و لخص حقوق المرأة فى حق واحد مطالب به فى اطار قانون متكامل لحماية المرأة من العنف و هو حق عدم المعاشرة الزوجية بالاكراه اللى هو فى رأى الأستاذ عمرو مطلب غريييب جدا ... كل ما يسأل الضيفتين عن المعاشرة بالاكراه يشرحوله انه الموضوع اشمل و اعم من كده و انه لازم يتكلم عن حقوق المرأة المهدرة عموما و يذكر المعاشرة بالاكراه فى اطار قضايا العنف اللى بيمارس ضد المرأة عموما و الضرب و السب و التحرش و ظروف العمل الخ ... لكن مافيش فايدة الأستاذ عمرو جايب ضيفتين افاضل بيعملوا فى مجال العنف ضد المرأة من زمن علشان يهزر و يستخف بقضايا حقيقية بتمس شريحة كبيرة من المجتمع العربى و جايب واحد "خبير علاقات زوجية" بيتكلم عن ان الشرع بيلزم الراجل انه يأدب مراته و يضربها و طبعا بيديه حق معاشرتها فى الوقت اللى هو عاوزه

معقولة يا ناس لسة بنتكلم عن ان الست ماتنزلش شغلها بعد الساعة ثمانية الا بتصريح خاص
معقولة لسة بندافع عن حق الراجل فى انه يضرب مراته و يهذبها و كمان يعاشرها بالعافية
معقولة برامج التلفزيون بتروج للكلام الفارغ ده
بجد حاجة تحزن

Labels:

3 Comments:

  • At 9:27 PM, Blogger ahmad said…

    أنا مش مصدق ، المجتمع نفسه يغرق أكثر في أي أفكار بتدعم الانغلاق ، و التكتم ، مش أزمة تليفزيون ، يعني أنا متأكد إنك لو سألتي الناس في الشارع : ايه رأيكم نلغي الرقابة على الأفلام؟ حتلاقي الناس حترفض ، و تطلب الرقابة

    أي وزير أو مسؤول ضامن بالثلث إن قراراته اللي مافيهاش انفتاح ، أو أفكار تقدمية حتمرر بسهولة ، ديتها حلقتين تلفزيون على راديو على تحقيقين جرنال ، و الناس حتتعود ، و تبقى جزء من تركيبهم الاجتماعي

    خسارة

     
  • At 7:52 PM, Anonymous MaLek said…


    خسارة على ايه يابوحميد ؟
    مادا طبيعي جدا وعاتشي جدا,الكلام دا بتاع الطبقة الوسطى بس او المتعلقين بأهدابها,الناس الطبيعيه اللي هي غالبية الشعب المصري,معندهاش مشاكل تماما مع اي حاجه ,واحد مرتبه 150 جنيه بالرشوة والحوافز الخ 300 جنيه 400 بالميت,حيقول لمراته متتأخريش بعد 8 وهي مرتبها أده؟ولا حيقولها اقعدي في البيت والرجال قوامين ع النساء؟طبعا الكلام دا عندنا احنا بس عند الطبقة اللي قادرة تفتح بيت بالراجل من غير الست او الراجل يقدر يحكم ويشكم بكام اّيه,يا عم دا تلت الأسر المصرية العائل الرئيسي فيها ست,أخلاق الطبقات الوسطى بتموت تحت يا استاذ,لما اجوع مافيش اخلاق ومافيش ربنا .

     
  • At 12:32 PM, Blogger اجندا حمرا said…

    اولا عوده حميده
    ايه يابنتي كل الغيبه دي؟وحشتينا

    ماشي ياعم المشغول المهم ماتتأخريش علينا تاني مفهوم ؟انا بهزر معاكي

    المهم انك رجعتلنا بالسلامه
    انا كمان كنت مسافره شرم اجازه استجميت شويه و رجعت بس كانت عايزاكي شرم هدوء ايه و حلاوه ايه ماحكلكيش لازم تروحيها بنفسك

    يابنتي انتا بطلت اتفرج علي التليفزيون من زمان برامج تشل و تقرف افكار غريبه و مش لاقيين حاجه يتكلموا عليها و عمالين بيهبلوا

    يالا معلش

    تحياتي ليكي ياقمر و حمدلله علي سلامتك

     

Post a Comment

Links to this post:

Create a Link

<< Home