رسالة من شارلوت صديقتى

الايام متشابهة

و المحبطات تتوالى

و المنغصات تتكاثر

و المسؤليات متعبة

و الياس يغلبنى

فافتح الكمبيوتر و ادخل على بريدى

اجد قصيدة لشارلوت برونتى

و كما لو كانت شارلوت موجهة رسالة لى بشكل شخصى

و ليه لاء ماحنا بنى آدمين زى بعض و فاهمين بعض

صحيح هى ماتت من اكثر من مئة و خمسين سنة

لكن حدوتة الحياة ماتغيرتش كثير

و شارلوت حبيبتى و صاحبتى و فاهمانى من زمان

من ساعة ماتعرفت عليها و انا فى الاعدادية و قرأت قصتها جين آير

شارلوت قالتلى فى قصيدة اسمها الحياة

ان الحياة مش حلم

و انه اوقات شوية مطر الصبحية بيبشروا بيوم لطيف

و انه احيانا بيكون فى سحب نكد

لكن كل دى حاجات و بتعدى

يعنى لو المطر حيخلى الورد يفتح

ليه نلوم سقوط المطر؟

و تكمل الست شارلوت و تقولى

انه ساعات الحياة المشمسة بتجرى مرحة

فاتمتعى بيهم وانت مزاءطتة و حامدة و شاكرة

لأنهم بيطيروا

و اوقات بيجى الموت

و بياخذ احسن ناس

و الحزن بيبقى حينتصر على الامل و يسحقه

لكن الامل بينط و يفط زى السوستة

مش مقهور بالرغم من وقعته

طاير باجنحة ذهبية

شايلانا و قوية

برجولة و من غير خوف

عشان ساعة المحاكمة و الحساب

حيظهر و يبان

انه حيهزم اليأس

و ينتصر الشجعان

Life

LIFE, believe, is not a dream
So dark as sages say;
Oft a little morning rain
Foretells a pleasant day.
Sometimes there are clouds of gloom,
But these are transient all;
If the shower will make the roses bloom,
O why lament its fall ?
Rapidly, merrily,
Life's sunny hours flit by,
Gratefully, cheerily,
Enjoy them as they fly !
What though Death at times steps in
And calls our Best away ?
What though sorrow seems to win,
O'er hope, a heavy sway ?
Yet hope again elastic springs,
Unconquered, though she fell;
Still buoyant are her golden wings,
Still strong to bear us well.
Manfully, fearlessly,
The day of trial bear,
For gloriously, victoriously,
Can courage quell despair !

Charlotte Bronte