Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Monday, July 02, 2007

اى سقف و السلام








انا كل يوم باشوف أجمل منظر فى القاهرة ...الهرم و النيل و الخضرة ...و من الشباك الورانى باشوف القلعة كمان
و ده بيساعدنى أقبل القاهرة و بيصبرنى عليها لأنه من الشباك الورانى برضه باشوف منظر ثانى خالص
باشوف مبانى كثير على الطوب الأحمر طالع منها اسياخ حديد
زى ما يكون القاهرة بقت موقع للبناء

منظر بيخلينى أفكر هو ايه اللى جرالنا؟ هو احنا ليه بقى شكلنا كدة؟
ستةعشر مليون مصرى بيشقوا و بيتعبوا و بيجروا على اكل عيشهم علشان يقدروا يعيشوا فى القاهرة
جرينا ورا اكل العيش افقدنا حاجات كثير
افقدنا الاحساس بالجمال
افقدنا الحلم
افقدنا طباعنا الحلوة
افقدنا اجمل ما كان فينا
عايزين ناكل و نشرب و نسكن
نسكن فى اى حاجة
نسكن تحت اى ظروف
و ايه النتيجة؟
النتيجة انه اغلب مبانى القاهرة بقت تحت التشطيب ... مش متشطبة ولا فى حد عاوز يشطبها

اللى بنوها حطوا القرش على القرش علشان يبنوا حيطان و سقف
و لما جالهم قرشين كمان ركبوا ابواب و شبابيك
و لسة مستنيين قرشين ثانيين علشان يعلوا دور والا دورين للاولاد
و فى منهم جالهم شوية فلوس قاموا شاريين ديش ... اصله الديش بيخرجهم من الغلب اللى هما فيه و بيجيبلهم دنيا أجمل
اصل دنيتهم بقت قبيحة ... قبيحة جدا
لكن لما باقرب شوية من المبانى اللى على الطوب الأحمر و طالع منها اسياخ حديد بالاقى ناس مش مستكفيين باى سقف و حيطة
و مش راضيين عن البشاعة اللى محاوطاهم و عاوزين حاجة اكثر شوية
ببساطة عاوزين شوية جمال
فى واحد زارع لبلابة طالعة على بلكونته مغطياها
و فى كذة واحد عامليين غية حمام بالخشب البغدادلى
و فى واحدة زارعة جهنميات مزهرين بالوان شرحة
و كل شوية الاقى بلكونة مدهونة و مرسوم عليها مناظر طبيعية او حائط مرسوم عليه الكعبة و واحد ثانى عليه رسومات اطفال
الناس دى اقلية وسط الأغلبية اللى مابقتش بتدور على اى شىء جميل
الأغلبية اللى مابتحسش بالجمال و لا محتاجاه
الأغلبية المطحونة اللى بتتعب و تشقى علشان ادنى مستوى معيشة
مش بتحلم الا بالأكل و الشرب... و سقف يسترها
اى سقف و السلام












Labels:

5 Comments:

  • At 2:04 PM, Blogger Egypt Rose said…

    انا بشوف نفس المنظر من مكتبي (ممكن تدخلي مدونتي متشوفي الصور ) المنظر بديع وكل ما اشوفه احب مصر اكثر واكثر .. كنت اعتقد انني الوحيدة التى تحب مصر بس فيه ناس كتير بيحبوها .. الناس اللى انت فرحانه بيهم وبيرسموا وبيزرعوا هم سكان مصر الاصليين .. سكانها اللى عايشين على ارضها طول عمرهم مش النازحين من الدول المجاورة او المغسولين بافكار طالبان اللى شوهوا بلدنا بافكارهم المدمرة ذات الطابع الكئيب افكار باحثة عن الموت والحياة بعد الموت .. ما يهمش عيشين اذاى او فين .. اهي عيشة قرف والسلام في دار السلام .. افكار متخلفة .. مش نعيش الاول وبعدين نفكر في الموت .. احنا عيزين نعيش يا جماعة واللى مش عاجبه يروح ايران .. باكستان .. افغانستان .. اى آن والسلام .. ويسبونا نعيش .. وعلى راي اللبنانيين .. حلو عنا بدنا نعيش احنا مش تعيشوا انتم عنا .. حلو عنا ..

     
  • At 11:47 AM, Blogger Amira Hassan said…

    مش عارفه اقولك ايه...مش بس الاحساس بالجمال االلي بيضيع في زحمة الجري ورا لقمة العيش و السكن..برضه الاحلام و الطموح..هاتي اي شاب لسه بيفكر في طموحه هتلاقي اقصى طموح له انه يعرف يتجوز لو حتى في شقة 60 متر من بتوع الشباب..لو كانت على الاحساس بالجمال كانت ممكن تكون معقوله..ده بقى الاحساس نفسه..هاتي لي اسرة و احده حد من اللي فيها بيحتوى حد غيره و بياخده في حضنه و بيقوله سلامتك لو تعب..لو تعب حد عيل..ابوه هيقعد شايل الهم هيعالجه منين..اعتقد اننا خلاص في زمن المسخ..

    وحشتيني بجد نفسي اشوفك

     
  • At 10:58 AM, Blogger elharam said…

    انا كل يوم باشوف أجمل منظر فى القاهرة ...الهرم و النيل و الخضرة ...و من الشباك الورانى باشوف القلعة كمان

    ما للاحظتيش حاجة غريبة فى كلامك؟
    إن أكتر حاجات عجباكى فى القاهرة بناها أجدادنا من زماااااااان أويييييييييى
    ليه وصلنا للقبح دا؟
    لما باتفرج على أفلامنا القديمة الأبيض وإسود باستغرب,الناس كانت غير الناس والبلد كانت غير البلد,والأخلاق كانت غير الأخلاق
    الغريبة إن الفساد طول عمره مستشرى فى البلد دى,صحيح عمره ما وصل للدرجة المؤسفة دى,بس إيه اللى وصلنا للدرجة القبيحة دى,صحيح إن الفساد هو توأم القبح وحاجات تانية كتييييير,بس إيه اللى وصل البلد تبقى قبيحة أوى كدة,من أول الشوارع للمجارى للزبالة للأحياء العشوائية للناس نفسهم؟

    egypt rose
    ملحوظة:أرفض وضع إيران مع باكستان وأفغانستان حتى لو كانت القافية هى اللى بتحكم وأصر على إستبدالها بطاجكستان

     
  • At 11:10 AM, Blogger ahmad said…

    الصور حلوة يا روزا
    إيه الشطارة دي؟
    مش ناقصك غير تعملي لينكات و تبقي خالص ما حدش يعرف يكلمك
    :)

    egypt rose

    مسألة حلوا عنا دي مش قادر أهضمها ، مش من حق حد يطلب من حد يمشي ، ما حدض يقدر يطالب الاقباط أو البهائيين بالرحيل ، و بالتالي ما حبش أسمع حد مستنير بيطالب الاسلاميين و بتوع الدقون انهم يمشوا ، و إلا يبقى أكثر إرهابا ، و الفرق إنه قاري كتب و بيعرف شوية لغات و مصاحب
    و لا إيه؟
    :)

    el haram

    يا استاذ إيران في كل حته ، و كونها بتحارب الامريكان ده ما يديهمش أي فضيلة ، كلها حسابات و مصالح زي ما انت فاهم

     
  • At 12:05 PM, Blogger elharam said…

    This comment has been removed by the author.

     

Post a Comment

Links to this post:

Create a Link

<< Home