Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Saturday, January 24, 2009

البوم الأصدقاء فى خيالى


فى الأيام الأخيرة وجدت نفسى اعود بذاكرتى لطفولتى و لطفولة اولادى و تذكرت كل الأصدقاء الخياليين الذين مروا بنا و سرحت بخيالى واعددت قائمة باصدقاء جدد لم التقى بهم ولكنى اعرفهم او اعرف الكثير عنهم و كان لهم تأثير كبير فى حياتى ... و لكل منهم صورة فى خيالى و لكل منهم مزايا و ربما نقاط ضعف جعلتنى اقدرهم و احبهم


فى البداية كانت القائمة طويلة و البحث عن الصور و الحقائق متعب فقررت أن انتقى اثنى عشر صديق و صديقة علشان القعدة تبقى ملمومة و حميمة و الحقيقة الأختيار من ضمن القائمة الطويلة كان اصعب من اعدادها و وجدتنى فى نقاش طويل مع نفسى لأننى لا اتخلى عن اصدقائى بسهولة ... لكن اليومين دول صعب و الاحباط و الاكتئاب لابسنى و لابس الدنيا كلها مما يستلزم رفع خطوط الدفاع و استحداث طرق الهروب ... و اخيرا قررت أن اكتفى بدستة اصدقاء خياليين يخفوا العبء عن اصدقائى الحقيقييين الذين يعانون من نفس اعراض الاكتئاب و الاحباط التى اصابتنى مؤخرا و ماحدش فيهم قادر يشيل نفسه اصلا


اختيارى لم يكن عشوائى و كان له معايير و حيثيات و بالرغم من ذلك النتيجة اذهلتنى

اصدقائى من النساء اقلية

و الأغلبية من الموتى

و القلة المتبقية على قيد الحياة من غير المصريين


من النساء اخترت الست ام كلثوم لأنها سيدة قوية و موهوبة و ذكية و اغانيها اسعدتنى و هونت عليا ايام سودا كثير و بكتنى و اطربتنى و اضافت لاحساسى باهم قيمة فى الحياة - الحب

و السيدة الثانية هى سعاد حسنى - سندريلا المعذبة التى لم تنل النهاية السعيدة و لا امير الأحلام و مع ذلك اسعدتنى و اسعدت كل بنات جيلى و بنات جيل بنتى بافلامها و اغانيها و رقصها و خفة دمها

اما قائمة الرجال المصريين فتضمنت تشكيلة جذابة و غير متجانسة و لا يجمع بينهم الا الموت

من مراهقتى بقى معى رشدى اباظة و عبدالحليم حافظ و اسباب تعلقى بهم ذات طابع عاطفى و نوستلجى - حنين لشبابى

اما من اصدقائى المصريين الذين ساهموا بشكل كبير فى نضجى و تشكيل وعيى و احساسى بالجمال - وقع اختيارى على نجيب محفوظ و سيد درويش و يوسف شاهين

و من بلاد الشام اخترت ادوارد سعيد الفلسطينى المولد و الدولى الهوية و زياد رحبانى المتمرد العبقرى و رفيق السنوات الاخيرة

اما الأصدقاء الفرنجة الذين لم اشعر بالغربة معهم ابدا فكان على رأسهم الأديب الكولومبى الذى اجبرنى على تعلم اللغة الأسبانية - جبرييل جارسيا ماركيز

وبقى صديقين احترت فى اختيارهم الى ان توصلت للاثنين اللى كان لهم تأثير كبير فى نموى الفكرى و الأكاديمى : نعوم تشومسكى عالم اللغويات و كولين ويلسن الكاتب و المفكر الانجليزى

من حسن حظى انى التقيت بنجيب محفوظ و ادوارد سعيد و يوسف شاهين
و مين عارف يمكن يجى يوم و اقابل بقية اصدقائى الخياليين - فى الحياة دى او فى حياة اخرى
ولو ماتقابلناش يبقى كفاية عليا اللى هما اضافوه ليا و الأيام اللى اسعدونى بيها و ساندونى فى تقبلها

Labels:

6 Comments:

  • At 4:33 PM, Blogger ahmad said…

    يا نهار اسود و منيل؟
    انتي قابلتي كل دول ، و ما قلتليش؟
    انا اصلا باحقد عليكي كفاية من ان ماركيز كان بيراسلك شخصيا

    اممممم
    حظوظ ، بس ملحوقة

     
  • At 12:18 AM, OpenID عمرو غربية said…

    الكتابة عن الناس دول مشروع تدوينات لوحده. فكرتيني بدستة مسودات عندي. أشترك معك في تأثري بولسن (المرحلة الوجودية!) و تشومسكي. أنا كمان عرفت محفوظ أكتر ما أعرف شغله. قائمة سريعة و غير كاملة تتوقف عند نهاية المراهقة: توماس إديسون؛ ليوناردو ذا فنشي؛ اسحق عظيموف؛ ستيفن هوكنج؛ كارل ساجان؛ ألبرت أينشتاين؛ فرنر هيزنبرج؛ كولن ولسن؛ اسبينوزا؛ كانط؛ لوك؛ بركلي؛ هيوم؛ ميشل فوكو؛ كارل بوبر؛ نيتشه؛ بيتهوفن؛ موتسارت؛ رباعي بنك فلويد؛ فراس السواح؛ كمال الصليبي؛ نصر أبو زيد؛ ألفن توفلر

    بعد كدا الدنيا وسعت قوي.

    فين الستات؟

     
  • At 12:49 PM, Blogger Purple Rose of Cairo said…

    يا احمد بلاش نفسنة ... ماركيز بعتلى ايميل واحد و كان بيرفض دعوة للحضور لمصر ... هو صحيح اتشكرلى انى اتعلمت اسبانى علشان خاطر عيونه و قالى انه بيعتبر ده اعلى تقدير سمعه من قراءه لكن كلها اشياء :)

    يا عمرو القائمة الاولى كان فيها اكثر من ستين اسم لكن كان لازم انتقى ... و عندى ازمة فظيعة انه الستات ماكنش لهم نصيب كبير فى القايمة ... المشروع قائم و يالا نشتغل

     
  • At 2:57 AM, Anonymous hala said…

    رفيق السنوات الأخيرة ؟؟؟؟ نعم نعم ؟؟ كدة الحرب بقت علنية بقى وحتخليني أقول أبو بنات أفكاري، بمناسبة القايمة، المعايير مختلفة طبعا وبناءا عليه أقوللك ان في قايمتي فرناندو بيسوا وتاركوفسكي وأنتونين أرتو ولوتسو بتاع الطاو، لكن خدي عندك بقى ستات بأشوف إن صحبتهم تبقى أمتع قوي من الرجالة الجامدين اللي دمهم تقيل دول واللي أول ما تبتدي تشتكيلهم من حزنك الوجودي يتريقوا أو ينظروا، لكن مثلا : عفت ناجي، آنييس فاردا، إميلي ديكنسون، فايزةأحمد، آن بانكروفت، سوزان سونتاج،جاكلين دوبري ،آني أرنو.. أكيد يبقوا ألطف قوي

     
  • At 1:13 PM, Blogger Purple Rose of Cairo said…

    يا استاذة هالة الحرب معلنة من زماااان و مش حاستسلم ابدا ...و انا معترفة انى عندى ازمة و شكلى بافضل صحبة الرجالةفى الخيال علشان اعوض ندرتهم فى الحقيقة و لهم تأثير اكبر فى حياتى ... يمكن لازم اخضع لعلاج فميبيستى او استمر فى البحث ... القايمة الطويلة كان فيها ستات كثير لكن لما وصلنا للنصفيات الاخيرة هما اتنين اللى قعدوا معايا

     
  • At 5:56 PM, Blogger يساري فلسطيني said…

    سيدتي تحياتي

    عندما نجد انسان يحب كولن ولسون و خصوصا كتاباته في الامنتمي و رائعته ضياع في سوهو التي قراتها عشرات المرات ... وعندما نتفق على روعة المناضل التقدمي تشومسكي تاذي تعلمت من افكاره اساسيات الذكاء الصناعي .. عندها كان يجب ان ارسل تحياتي لك سيدتي و طلب الفولو على تويتر

    يساري فلسطيني و ينادوني مراد

     

Post a Comment

Links to this post:

Create a Link

<< Home