الشرطة و الشعب فى خدمة الوطن

من يوم اضراب 6 ابريل و انا نفسى اكتب لكن وقتى ماسمحش علشان كنت باجرى وراء أكل العيش و شباب معتقلين و اقسام بوليس و سجن المرج ومركز هشام مبارك و باخوض تجارب جديدة علي و باصاب باحباط و دهشة و بانحنى احتراما و اكتشف بطولات انسانية و باحاول افهم و احلل و اقبل و ارفض ...

و فى وسط الزحمة دى فى فكرة مش راضية تفارقنى و محيرانى و واخذة عقلى و مجننانى

وزارة الداخلية فيها ذكاء منظم لخدمة جهة ما والا عشوائية؟؟؟؟

و كل ما افكر و اراقب و ارصد و احلل مؤشرات اقتنع اكثر انها عشوائية

و دى الحقيقة فكرة مرعبة ...

حتى لو كنت بتكرة الكيان الهلامى المرعب اللى اسمه وزارة الداخلية و رجالته من العسكر

عشوائية تصرفات رجال الداخلية حاجة مربكة و ماتطمنش ابدا لأن الواحد منا فى الآخر عاوز يخطط تصرفاته و سلوكياته بناءً على توقعات

و فى التعامل مع وزارة الداخلية مابنعرفش ايه اللى ممكن يحصل و المسألة شخصية جدا -

يعنى التعامل كله مرتبط بشخص العسكرى او الظابط اللى بتتعامل معاه و مزاجه ساعة التعامل و الظروف المحيطة وليدة اللحظة ... غالبا بيكون فى سياسة و استراتيجية على مستوى أعلى فى الهيكل الهلامى و لكن يبدو انهم ما عندهمش سلسلة تواصل بالرغم من وجود هرم سلطة من نوعٍ ما

و المؤكد برضه انه الداخلية مستقلة عن كل الوزارات و الجهات الحكومية و التعامل مع الجهات الأخرى مختصر على اصدارالتعليمات و الأستحواذ على كل الملفات و التعامل معها بشكل أمنى

و مجالس الوزراء و الشعب و الشورى بيتبعوا التعليمات و يبصموا عليها و يقولوا آمين

و فى اطار دولة دستورها المعدل اخيراً جعلها دولة بوليسية ده شىء متوقع و مفهوم

لكن الكارثة الحقيقية انه وزارة الداخلية تصرفاتها عشوائية و غير منظمة

و الكارثة انها موظفة مليون مصرى و ميزانيتها تضخمت بشكل غير مسبوق

و كمان مختصمة المواطن المصرى و عاوزاه يخدم معاها تحت شعارها المستحدث "الشرطة و الشعب فى خدمة الوطن" وكل ده

بحجة الأمن القومى و أمن الدولة

و الأمن القومى و أمن الدولة مش مرتبطين باى شكل من الأشكال بأمن المواطن و لا باستقراره المادى و المعنوى

يعنى لو المواطن بيشتكى من الفقر و الجوع مش مهم

لو المواطن مش قادر على غلاء الأسعار برضه مش مهم

لو مش لاقى رعاية صحية و لا تعليم يبقى أحسن علشان يمرض و يجهل و مايوجعش دماغنا

و لو عنده أزمة سكن يبقى يتدفن فى العشوائيات و نحاصره و ذلك أفضل

و لو اضرب او تظاهر يتضرب و يتسجن

و ساعتها اللى كان بيفكر يقلده حيتلم و يمشى جنب الحيط

طيب ايه اللى حيحصل لما المضربين و المتظاهرين يكثروا زى ما حصل فى المحلة؟

الداخلية حتلم شوية ناشطين على شوية قيادات عمالية وتفصل قضية تنظيم و تحظره لغاية مالناس تهدأ

و الحكومة حتصرف شوية حوافز على منح على زيادات و هى متضررة لأنها بتاخذ من حساب الفساد

و بعدين الناس حتكتشف انه كل ده مش مكفى معدلات التضخم الناتجة عن مؤشر فساد بيلتهم كل معدلات النمو الاقتصادى

و الناس حترجع تتظاهر و تضرب

و كل مرة الأعداد حتزيد و حتحتاج الداخلية تجند ناس اكثر و بالتالى تحتاج ميزانية اكبر

و طبعا الميزانية مش بتتوزع بشكل عادل على كل رجالة الداخلية

و ولاءهم حيتناقص و فاعليتهم حتقل و قناعتهم حتتغير

و حيجى يوم و حيفقدوا السيطرة على معدلات الجريمة المتزايدة مع معدلات الفقر

و حيفقدوا السيطرة على حلفائهم من قيادات الجريمة

و حيفقدوا دعم رجال الأعمال اللى بيدعموا السلطة

حيجى يوم و عشوائيتهم حتنقلب عليهم

مش قادرة اتصالح و لا اتقبل اللى بيعملوه فى البلد دى

و مش قادرة اعمل حاجة غير انى اكتب لأننى عاجزة عن التصدى لهم بشكل ذكى او منظم

زيى زى أغلب شعب بلدى