Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Thursday, November 16, 2006

موت طليق نادية

نادية صحبتى مطلقة من زمان
بتشتغل و تشقى علشان تصرف على اولادها بقالها سنين و ايام
ربنا فتحها عليها و محوجهاش للسؤال
و رضيت بنصيبها و عمرها ما اخذت مليم من ابو العيال
مش كدة و بس دى كمان عمرها ما اشتكت ولا بكت و لا قالت غنوة اسى ولا موال

النهاردة الصبح صحيت على خبر وفاة محمد اللى هو طليق نادية و اللى هو برضه ابو العيال
نزلت من بيتنا على ملا وشى مش قادرة اصدق ان زميل الدراسة "توفى الى رحمة الله"
ومشيت فى الشارع اكلم نفسى و اقول
ده مش ابو واحدة زميلتى ولا جدها و لا ستها
ده محمد طليق نادية
"لا حول و لا قوة الا بالله"

مش قادرة دلوقتى افتكر تفاصيل الدفنة و لا شكل امه ولا مراته
ولا قادرة افتكر كلام اولاده ولا حتى حكاية الذبحة اللى انهت حياته
كل اللى قادرة افكر فيه هو سفالة و بجاحة احمد اللى هو شريك المرحوم و أكبر اخواته
اللى وقف على باب المدفن يساوم نادية فى اللى اخوه سايبه ميراث لاولاده

مافاتش يوم واحد على موتك يا محمد
و المحاميين اشتغلوا
و اولاد الحلال اتحشروا
و اولادك انت اللى اتيتموا للمرة الثانية و اتجرحوا

نفسى يا محمد تقوم من رقدتك و تقول لاحمد اخوك ان الكفن مالوش جيوب و
"لا حول و لا قوة الا بالله"


3 Comments:

  • At 12:13 PM, Anonymous Hala Khalil said…

    قصة حزينة جدا... وبتحصل كثير
    للأسف احنا بنخاف على الفلوس لدرجة افقدتنا رهبة الموت و احترامه
    هالة

     
  • At 10:59 PM, Anonymous Anonymous said…

    ربنا معاها وينصرها
    ودايما انصحيها تقول
    حسبي الله ونعم الوكيل
    وانصحيها انها متزعلش علي فلوس
    المهم ربنا يبارك في اولادها
    ربنا يرحمه ويرحمها ويرحمنا

     
  • At 4:55 PM, Blogger Amira Hassan said…

    و الله انا اتأثرت جدا لما قريت القصه دي ..فكرتني بحوارات قديمة حصلت لي انا شخصياً..لا حول ولا قوة الا بالله للاسف مهعدش في حد بيحس برهبة الموت

     

Post a Comment

Links to this post:

Create a Link

<< Home