Purple Rose of Cairo

This is a space for free expression and to speak out against hypocrisy; It’s a space where we can speak of daily problems no matter how trivial; It’s a space for confronting our issues and discussing them honestly.

Friday, January 27, 2012

رسالة من خالتكم سلمية

أنا آسفة يا شباب انى الحيت عليكم تشلونى على كتافكم و تجروا بيه
ماكنش قصدى اخدعكم كان قصدى احميكم
و احمى العسكر من شر اعمالهم و شر اعمال الحرامية
كنت متصورة انى خالتكم
و خالتهم هما برضه
و كان عشمى انهم يقدرونى
لكن طلعوا قلالات الاصل ما بيهمهمش غير ورث ابوهم
ورث نجس و فاسد من يومه ..
عيال ما اتعلمتش و ماتربتش
عيال ماتعرفش انه الدم عمره ما يبقى مية
مالهمش خير فى امهم مصر
و لا عارفين أختها سلمية
أنا مش حاموت
أنا حاستخبى
و حيجيى يوم و اولادهم حيقلعوا البدلة و البيادة
و حيجيى يوم و حيسألوهم عليه
ساعتها بس حاسامحهم
و انتم كمان حتسامحونى
و حيحبوا على راسى و على رأسكم
و على كتافهم حيشيلونى
ساعتها بقى بيت اختى حيعمر
و كل ركن فيه بيكم و بيهم حينور
و ساعتها حانام و أنا مرتاحة
بس أمانة مع كل طلعة نهار تبوسولى امكم
و مع كل اذان و جرس كنيسة تفتكرونى

خالتكم سلمية